Catalonha

Catalonha ei un país singular plaçat en nòrd-èst dera peninsula Iberica, limitat pes Pirenèus ath nòrd e peth delta der Ebre ath sud. Considerat dempús longtemps un país d’acuelhuda, Catalonha s’a tostemp definit pera sua localizacion e pera sua millenària istòria mercada pera diuersitat sociau e culturau.

Se pòden trobar evidéncies d’aquera istòria enes comunautats locaus que i a disperses en tot eth territòri: er assentament roman de Barcino, que siguec era origina dera ciutat de Barcelona, es glèises romaniques e es catedrales dedicades as sants locaus, es castèths que separauen es reiaumes crestians deth califat islamic d’Al Andalus ena edat mejana, es òbres mèstres modernistes d’Antoni Gaudí e es sòns discipols e es monuments arquitectonics contemporanèus que hèn de Catalonha un centre internacionau dera tecnologia e era innovacion.

Tre eth començament deth sègle XVIII, diuèrsi regims politics, includida era dictadura de Francisco Franco entre es ans 1939 e 1975, an criminalizat era lengua e era cultura catalanes, mès, gràcies ara sua capacitat de resisténcia, fòrça catalans an consagrat era sua energia e era sua creativitat a reforçar era sua lengua, qu’actuauments a mès de dètz milions de locutors. Tanben an creat organizacions culturaus que fomenten es expressions culturaus locaus, tot açò mentre an integrat mès d’un milion de naui immigrants en darrèr decènni.

Aqueri esfòrci son eth resultat d’ua reneishença culturau potenta que se debanèc ena mitat deth sègle XIX. Era Reneishençaarrecuperèc era lengua que se parlaue en casa e en campèstre e li dèc dignitat de lengua d’expression creativa. Ar encòp, aqueth movement exaltaue es tradicions locaus, es lòcs istorics, era istòria e eth singular païsatge dera region. Aqueth movement romantic transformèc entièraments es valors catalanes. Deth temps qu’es catalans cercauen naues manères d’exprimir era sua identitat cambianta, creèren naues expressions e organizacions culturaus. Quitament ara ora d’ara fòrça catalans canalizen era sua grana creativitat per miei d’aqueres organizacions deth patrimòni culturau entà mantier era vitalitat des sues cultures locaus e mejans de vida.

Aguest estiu que trapam era edicion Catalonha:Tradicion e Creativitat ena Mediterranèa, que se debanarà ena Esplanada Nacional deth 27 de junh ath 1r de junhsèga e deth 4 ath 8 de junhsèga de 2018 pendent eth Smithsonian Folklife Festival. Tanben vos convidam a descorbir es idèes qu’an inspirat eth programa deth hestivau e conéisher diuèrsi catalans que partejaràn es sues istòries en linha.