Catalonha a ua tradicion inegalabla d’integracion des nauvengudi d’autes parts d’Espanha e der estrangèr en sòn entorn culturau. Considerat dempús longtemps coma un país d’acuelhuda, Catalonha s’a tostemp definit pera sua ubicacion e era sua millenària istòria mercada pera diuersitat sociau e culturau.

Enes darrèri dus sègles, s’an produsit intensi fluxi migratòris qu’an agut un impacte significatiu ena populacion. Pendent eth sègle XIX, se produsic eth començament dera industrializacion e, en conseqüéncia, era populacion aumentèc enquiath 34%. Maugrat qu’aquera tendéncia demorèc estancada pera Guèrra Civiu Espanhòla (1936–1939), Catalonha artenhec de mantier era sua basa industriau. Entre es ans 1939 e 1981, era populacion se dupliquèc damb era arribada d’immigrants que cercauen trabalh d’autes parts d’Espanha, sustot deth sud, en ciutats coma Badalona, Cornellà de Llobregat e L’Hospitalet de Llobregat.

En contèxt dera recenta crisi migratòria europèa, mès deth 15% des residents en Catalonha son nauvengudi de diuèrses origines culturaus e lingüistiques: nòrd d’Africa, era America Latina, China e Romania, entre d’auti. Maugrat aguesti pics d’immigracion, e dilhèu coma conseqüéncia, era societat catalana a causit era integracion des nauvengudi. Per exemple, en 2009 es còlhes castelleres comencèren ua campanha entara integracion dera populacion nauvenguda damb er eslogan “Toti èm ua còlha”. Ena scèna musicau, era iconica rumba catalana a es origines en flamenc gitan, ena rumba cubana e en d’auti sons dera America Latina.

Totun, eth concèpte d’integracion catalan ei un shinhau diferent deth des Estats Units. En lòc de reclamar identitats ibrides, es catalans an integrat as nauvengudi en sòn esperit, ei a díder, ara sua manèra d’èster. Era gent mòstre era sua catalanitat en tot parlar eth catalan e participar ena vida vidanta. Quan ua persona junh eth comitat dera hèsta major, per exemple, se ditz qu’aquera persona hè pòble. Catalonha intègre es diferéncies culturaus, etniques e politiques en tot acceptar as nauvengudi quan comencen a participar ena vida publica.