-
Castellers bastissen era pinya (basa) d’ua tor umana, que foncione coma un ret entà protegir des queigudes as persones enes nivèus mès nauti.Fòto per Josep M. Surroca“Fem pinya!” (Anem amassa!)
Er engatjament des catalans per participar actiuaments ena vida publica a permetut de tèisher un hilat considerablaments resistent d’associacions que junhen as persones.
Pendent era Reneishença, es catalans mès benestants creèren atenèus a on s’amassauen abitualaments entà apréner catalan, experimentar damb es arts e enriquir era vida dera comunautat locau. Ena fin deth sègle XIX, es catalans de classa obrèra auien creat sindicats influents entà deféner es drets des obrèrs deth sector industriau.
Aqueri dus fenomèns sociaus se fusionèren entà crear ua cultura basada en associacionisme, qu’a arribat enquiàs nòsti dies. Per aquera arrason fòrça catalans son membres de diuèrses associacions culturaus non governamentaus. Quitament en un pòble de dus mil abitants i pòt auer enquia set o ueit associacions arreconeishudes formauments, e quauqui uns d’aqueri grops locaus an artenhut era arreconeishença de toti pera sua excelléncia artistica. Aqueres associacions locaus organizen concèrts de musica classica e corau, ensenhen dances tradicionaus, mantien viues expressions culturaus tradicionaus, entre d’autes causes. Ar encòp, creen un fòrt hilat sociau en quau es catalans collabòren entà mantier era vida culturau locau.
Enes darrèri ans, aqueres associacions an admetut a persones nauvengudes en Catalonha e les an proporcionat ua oportunitat, informau mès importanta, d’amassar-se e collaborar damb gent de tota sòrta. Es ONG tanben permeten as catalans de contribuïr ath delà der encastre domestic e deth trabalh. Aqueres associacions son un exemple des esfòrci constants que hè Catalonha entà fomentar era coesion sociau, ei a díder, enfortir es laci que junhen as persones maugrat que provenguen d’auti lòcs.
